Robert Burns




The Blue Eyed Lassie

I.
I gaed a waefu' gate, yestreen,
   A gate, I fear, I'll dearly rue;
I gat my death frae twa sweet een,
   Twa lovely e'en o' bonie blue.
'Twas not her golden ringlets bright,
   Her lips like roses, wat wi' dew,
Her heaving bosom, lily-white,
   It was her een sae bonie blue.

II.
She talk'd, she smil'd, my heart she wyl'd,
   She charm'd my soul I wist na how;
And ay the stound, the deadly wound,
   Cam frae her een sae bonie blue.
But spare to speak, and spare to speed;
   She'll aiblins listen to my vow:
Should she refuse, I'll lay my dead
   To her twa een sae bonie blue.